假使美濃會起水庫

一條幾億噸個水龍
日日夜夜
想要衝下來吞殺歸莊人
半夜醒來
會聽到河壩叫泣個悲聲

電鋸會鋸盡山頂個樹林
變做一棟一棟高級洋樓
山靈會走避深山
綠色個靚山會失去青春個光彩
田坵會變做大路屋仔
農民會穿上西裝
毋識麼介煙草禾仔

街上沒人想講客話
親切個鄉音
只有對老伙房傳出來

鄉親會賣田賣地
客家人會變成人客
食飽後就要惦惦離開

祖先個靈魂
會託夢安慰子孫
講這就係客家人命運個原罪

鐘理和會還魂
倚佇笠山頂
寫下生前沒完成個
笠山悲歌

假使美濃會起水庫
留下來個客家人
只好準備放火燒天