心碎酒醉

《心碎酒醉》Sim Tshuì Tsiú-tsuì
方顺吉Png Sūn-kiat

点一枝薰
tiám tsi̍t-ki hun
看着窗外的云
khuànn-tio̍h thang-guā ê hûn
一时忽然间
tsi̍t-sî hut-jiân-kan
空气使人心忧闷
khong-khì sú lâng sim iu-būn
冷风吹入窗门
líng-hong tshue ji̍p thang-mn̂g
加添阮的辛酸
ka-thiam gún ê sin-sng
只怨命运
tsí uàn miā-ūn
来作弄咱缘份
lâi tsok-lōng lán iân-hūn

唱这首歌
tshiùnn tsit siú kua
这首予你的歌
tsit siú hōo lí ê kua
一句一声
tsi̍t-kù tsi̍t-siann
只有你才会知影
tsí-ū lí tsiah ē tsai-iánn
彼当时有你陪伴
hit-tong-sî ū lí puê-phuānn
如今只有孤单
jû-kim tsí-ū koo-tuann
大声叫出心爱你的名
tuā-siann kiò tshut sim-ài lí ê miâ

毋知你的心肝
m̄-tsai lí ê sim-kuann
敢犹有现在的我
kám iáu-ū hiān-tsāi ê guá
抑是已经
ia̍h-sī í-king
佮著别人来生活
kah tio̍h pa̍t-lâng lâi sing-ua̍h

心碎也无人来伴
sim tshuì iā bô-lâng lâi phuānn
酒醉也无人来看
tsiú-tsuì iā bô-lâng lâi khuànn
我半茫半醒
guá puànn bâng puànn tshínn
目屎已经予风吹焦
ba̍k-sái í-king hōo hong tshue ta